Luke 18

Hiwape ehebo yana awanoi tauloina ehebo ainai

1Ehebo walo vegevegedi Yeisu imohedi ta ebeha havena awanoi ainaena hitapitapiya. 2Teina dova iwalo, ‘Ehebo dalava ainai tauloina ehebo mwalaꞌina imiyamiya, iya nigele Yaubada iyameheuhei na hinage tomowa nigele iyaveꞌahihiyedi. 3Na tupwanane ainai hinage ehebo hiwape imiyamiya, hauga bagibagilina hiwapenane imahamahalava tauloinane ainai na iꞌawaꞌawanoi hagu vehabana iwalo, “Taubada, agu aleha ainaena uvedumwalugau”.

4‘Hauga ehebo ehebo dova yana paihowa na hesi tauloinane nigele nuwana ihagui. Na ehebo hauga ainai tauloinanane tauna isosomana na iya ibom ainai iwalo, “Badagi, Yaubada nigele yayameheuhei na hinage tomowa nigele yayaveꞌahihiyedi, 5na hesi hiwapene teina yana lau alaꞌalabilima aliguwai vehabana yavedumwalu ana aleha ainaena, mata dova ta agu tausosomana imwauwi”.’

6Ainaena Yeisu hinage iwalo aulidi iwalo, ‘Taubada teina yana walo vehabana am nuwanuwatuwu walo moiha ibom towaho yababana na hesi hiwape ihagui. 7Hinage dova Yaubada yana tomowao vesivesinuwadi ihaguidi hauganane ebe hiꞌawaꞌawanoi hamahamadudu ainai ahubena yo boniyai aidiyai, 8na yana hagune mata dumwaluna ipaihowa aidiyai.

‘Na vedova omiu yami nuwatuwu ebe hauganane Yau Tomowa Moihagu yalau gwaipilema baleꞌuwai, viha tomowa mata mayadi yemidi yalobaidi hitowotowolo wahiyala?’

Palisi na takesi ana tauvai yadi awanoi

9Tomowa tupwadi hinuwanuwatuwu ebeha hiya taudumwalu na vali tomowa nigele, eeta Yeisu iwalo vegevegediyedi teina dova, 10iwalo, ‘Ehebo hauga ainai tomowa hitau bwau hiluwu vada tapwalolo mwalaꞌina ainai habi awanoi Yaubada ainai. Ehebo Palisi na ehebo takesi ana tauvai. 11Palisiwa ibom itowololau lovai iꞌawaꞌawanoi iwalo, “Yaubada yo, yaꞌawa yauwedo alimwai wuwuna yau nigele dova augeluwo mumugadine wuwuna hiya hiꞌaiꞌaivavali, yo hiꞌoyaꞌoyama yo hipwanopwanoli, na yau nigele dova takesi ana tauvaine tenem. 12Yau hesi wiki ehebo ehebo ahubena bwau yahudihudi, yo hinage yagu tobwatobwao aidiyena tupwadi yamohemohego.”

13‘Na hesi takesi ana tauvaine lovaena itowolo na mayana hinimaya nuwanuwana itutututu na ipwagogo na iꞌawaꞌawanoi iwalo, “Yaubada yo, bada uhanapuigauꞌo ebeha yau tauyababa ainaena uꞌatemuyamuyaegau!”.’

14Eeta Yeisu aidiyai iwalo, ‘Moiha, towaho teina yana awanoine vehabana mata ana awanamwanamwa ilobai Yaubada ainaena, na hesi Palisine nigele. Wuwuna ebe yaiya iꞌabihiniuyoi mata hiꞌabiye talu, na ebe yaiya iꞌabiye taluyoi mata Yaubada iꞌabihini.’

Hedaheda Yeisu iwalo velauwedi

(Madiu 19:13-15; Maki 10:13-16)

15Tupwadi tomowa natudiyao habuludi hilauvaidima ta ebe Yeisu iꞌabi towoidi, na ana taumulitaone hiꞌaꞌauhidine.

16Na Yeisu iwalo lau aidiyai iwalo, ‘Hedaheda amtalamwedi ta aliguwai hilaoma. Hedaheda teina dova Yaubada yana Abaloina ilowonanaedi moiha. 17Wuwuna ebe yaiyadiwo dova teina hedahedaone yadi yemidine, howahowana Yaubada yana Abaloina ainai hiluwu, na ebe nigele, mata nigele hiyaluwu.’

Tobwatobwa vehabana

(Madiu 19:16-30, Maki 10:17-31)

18Yudeya yadi taumugai ehebo ilaoma na Yeisu ipanivilae, iwalo, ‘Taubada yahanahanapui ebeha owa tauveꞌita namwanamwana, ainaena hava yapaihowai ta ebe yawahi vateyai yalobai?’

19Na Yeisu towahonane iwalo auli iwalo, ‘Vedova ta uꞌaꞌawa namwanamwaegau? Wuwuna nigele teya yaiya iyanamwanamwa, bada Yaubada ibom. 20Na Yaubada yana loinao bada uhanapuidiꞌo, neta ebeha: Havena pwanoli, havena yemwalowoi, havena aivavali, havena veꞌewa oyaꞌoyama. Na hinage tamam yo hinam uveꞌahihiyedi.’

21Na towahowa iwalo, ‘Yagu hauga heda ainaena ta wau loinaone teina yamulita iliꞌilimanidiꞌo’.

22Yana walo teina dova Yeisu ibenalei, eeta iwalo, ‘Ehebo ginauli hinage nigele alimwai, neta yam tobwatobwa maudoina uvegimwalaedi na adi maihaone tauwewelohe aidiyai uꞌaiyauyaei, na ulaoma ta umulitaegau ta ebe howola abo yamtobwatobwa galewai ulobai’. 23Walone teina towahonane ibenalei ta inuwayababa moiha wuwuna yana tobwatobwa imwalaꞌi alili.

24Yana nuwavitaine bada Yeisu ihanapuiyaꞌo, eeta tomowa aidiyai iwalo, ‘Ebe yaiyadiwo hiya mayadi tobwatobwa mwalaꞌina yadi luwu Yaubada yana Abaloina ainai ivitai alili. 25Moiha, kameli iya lagulagu mwalaꞌina, ta tupwana ivitai na nidili gudana ainaena iluwu, na hesi wasawasao yadi luwu Yaubada yana Abaloina ainai ivitai alili.’

26Taumulitaowa Yeisu baidanao himiyamiyawa walonane hibenalei ta hipanivila hiwalo, ‘Ebe teina dova, yaiya yede howahowana na awanamwanamwane ilobai?’

27Eeta aidiyai iwalo, ‘Hava tomowa aidiyai nigele howahowadi, mata Yaubada ainai ginaulinane malamalaidi’.

28Ainaena Pita Yeisu ainai iwalo, ‘Taubada, ai mata vedova? Wuwuna bada yama dalavao alaugabaidiꞌo na amumulitaegone’.

29Na Yeisu maudoidi iwalo aulidi iwalo, ‘Yawalo dumwalu alimiyai ebe yaiyadiwo omiu yami dalava yo mwanemiyao yo tahimiyao yo tamamiyao yo hinamiyao yo natumiyao amlaugabaidi na Yaubada yana Abaloina ainai amtalamwegomiu, 30hauga teina ainai maiha mwalaꞌina amlobai, na hinage hauga ilalaoma ainai yawahi vateyai amvai’.

Yeisu yana mwalowoi iwalo mahalavaei

(Madiu 20:17-19; Maki 10:32-34)

31Yeisu hitau 12 iyoga ahaidi ta iyemiya wahiyedi na aidiyai iwalo, ‘Teina hauga tahahae Yelusalem na ginauli maudoina tauwalo mahalavao mwalona hileleyaꞌo yau Tomowa Moihagu vehabagu muhamuhana himahalava ta amꞌitadi. 32Mugai hivaigau nigele Yudeya aidiyai, na hiꞌabi talawahiyegau yo hiꞌabiye hinimayagau na hihowaigau, 33yo hinage balavaiyena hipwediligau na abo hiꞌoiye mwalowoigau, na ahubena tonuga ainai mwalowoiyena yatowolouyo.’

34Na ana taumulitaowa nigele teya yana walone ana nuwamasele aidiyai iyaluwu.

Yeisu ehebo taumehegibugibu iꞌabiye namwanamwa

(Madiu 20:29-34; Maki 10:46-52)

35Yeisu Yeliko ainai imahalava na ehebo taumehegibugibu amwahai imiyamiya, na iꞌawaꞌawanoi mane yo tobwatobwa vehabadi. 36Towahowa Yeisu mayana bodao alinadi ibenalei ta isupuna na iwalo, ‘Yaiyadiwo neta?’

37Na hiwalo, ‘Yeisu towaho Nasaleti ilaolaomane’.

38Na taumehegibugibunawa iyoga mwalaꞌi na iwalo, ‘Yeisu yo, owa Deivida yana huhu, uꞌatemuyamuyaegau!’.

39Na tomowaowa himugai ta towahonane hiꞌauhi hiwalo, ‘Ulau mwau havena uyogayoga!’.

Na iyoga hamahamadudu iwalo, ‘Deivida tubuna yo, uꞌatemuyamuyaegau’.

40Yeisu itowolo na iwalo aidiyai ta towahowa hiyogaenama. Na ilaoma ta ipanivila? iwalo, 41‘Hava nuwanuwam yapaihowai alimwai?’

Na iwalo, ‘Bada, nuwanuwagu ebeha mehegu hinamwanamwa?’

42Na Yeisu iwalo, ‘Uvinunuyo wuwuna yam yemidi ilivahigoꞌo’.

43Tenem ainai mehena himasele ta iꞌawa yauwedo Yaubada ainai na Yeisu imumulitaeine. Na bodaone hiꞌita, ta maudoidi Yaubada hinoꞌowei.